Um drengi og stúlkur í íslenska menntakerfinu

Fleiri konur en karlar brautskrást með háskólapróf á ári hverju hér á landi en karlar eru líklegri til þess að ljúka starfsnámi. Lætur nærri að tvær konur ljúki háskólanámi fyrir hvern einn karlmann. Þar að auki ljúka fleiri konur stúdentsprófi á ári hverju en karlar og hefur svo verið frá árinu 1978. Við sýnum fram á hvernig stúlkur ná (að meðaltali) smám saman að standa sig betur í grunnskóla í bóknámi og ná þar forskoti (að meðaltali, sem og í toppi einkunnadreifingarinnar) sem þær halda fram á fullorðinsárin. Hátt brottfall drengja úr framhaldsnámi skýrir af hverju færri ljúka háskólaprófi. Einnig vörpum við ljósi á athyglisverða skiptingu kynjanna á námsgreinar á háskólastigi. Niðurstöður benda til þess að viðhorf og gildismat kynjanna sé ólíkt og að skólakerfið nái betur að hvetja stúlkur til dáða.